ବର୍ଷା ହେଉଛି ମିଳନର ଋତୁ । ବର୍ଷାର ସ୍ପର୍ଶରେ କେତେବେଳେ ମନ ପୁଲକିତ ହୋଇଯାଏ ତ ପୁଣି କେତେବେଳେ ବିରହରେ ଡୁବି ଯାଏ । ମିଳନର ବାର୍ତ୍ତା ନେଇ ଆସିଥିବା ବର୍ଷା କାହାପାଇଁ ପ୍ରେମର ଚିଟାଉ ସାଜେ ତ କାହାପାଇଁ ବେଦନାର କାରଣ । ସେଥିପାଇଁ ତ ବର୍ଷାକୁ ନେଇ ଅନେକ ଗୀତ, କବିତା । ଓଡ଼ିଆ ସିନେମାରେ ବର୍ଷାକୁ ନେଇ ଅନେକ ଗୀତ ସୃଷ୍ଟି ହୋଇଛି । କେତେବେଳେ ବର୍ଷା ମିଳନର ଗାଥା ଗାଇଛି ତ କେତେବେଳେ ବେଦନାର । କେତେବେଳେ ବର୍ଷାର ସ୍ପର୍ଶ ମନରେ ପୁଲକ ସୃଷ୍ଟି କରିଛି ତ କେତେବେଳେ ତାର ଟୋପା ହୃଦୟକୁ ବିଦାରିଛି । ବର୍ଷାକୁ ନେଇ ସିନେମାରେ ଗୀତ କରିବା ଧାରା ବହୁ ପୁରୁଣା । ୧୯୫୯ରେ ମୁକ୍ତିଲାଭ କରିଥିବା ଓଡ଼ିଆ ଚଳଚ୍ଚିତ୍ର ‘ଶ୍ରୀଶ୍ରୀ ମହାଲକ୍ଷ୍ମୀ ପୂଜା’ର ‘ଆକାଶରେ କେତେ ବିଜୁଳି ଚମକେ…’ ଓଡ଼ିଆ ଚଳଚ୍ଚିତ୍ର ଜଗତର ପ୍ରଥମ ବର୍ଷା ଗୀତ । ଏହା ପରଠାରୁ ବର୍ଷାକୁ ନେଇ ସିନେମା ଓ ଗୀତର ଧାରା ଚାଲିଆସିଛି । ଆମ ସମୟର ଓଡ଼ିଆ ସିନେମାରେ ବର୍ଷାକୁ ନେଇ ରହିଥିବା କିଛି ମନମତାଣିଆ ଗୀତକୁ ନେଇ ଏଇ ଉପସ୍ଥାପନା । ୧୯୭୬ ମସିହାରେ ପରଦାକୁ ଆସିଥିବା ଅଭିନେତା ତଥା ନିର୍ଦ୍ଦେଶକ ପ୍ରଶାନ୍ତ ନନ୍ଦଙ୍କ ନିର୍ଦ୍ଦେଶନାରେ ନିର୍ମିତ ସିନେମା ‘ଶେଷ ଶ୍ରାବଣ’ରେ ବର୍ଷାକୁ ନେଇ ଦୁଇଟି ଅତି ଚମତ୍କାର ଗୀତ ରହିଥିଲା । ଏହି ଗୀତଦ୍ବୟ ଆଜିବି ଓଡ଼ିଆ