ଉତ୍କଳୀୟ ସଂସ୍କୃତି ଅନନ୍ୟ । ଏହାର ପରମ୍ପରା ଓ ଧର୍ମଧାରା ଭିନ୍ନ । ବାର ମାସରେ ଏଠି ତେର ପର୍ବ । ଖାଇବା ଆଉ ଖୁଆଇବା ଆମର ପରମ୍ପରା । ଏଠି ଆମ ଆରାଧ୍ୟ ଭୋଜନପ୍ରିୟ । ସେଥିପାଇଁ ଓଡ଼ିଶାବାସୀମାନେ ବି ଖୁବ ଭୋଜନପ୍ରିୟ । ଛପନ ପ୍ରକାର ବ୍ୟଞ୍ଜନ ତାଙ୍କ ପାଖେ ନିତି ଭୋଗ ହୁଏ । ଓଡ଼ିଶାର ଖାଦ୍ୟରେ ଭରି ରହିଥାଏ ଗୋଟେ ଅଲଗା ପ୍ରକାରର ଭାବପ୍ରବଣତା । ଭାତ ଆମର ମୁଖ୍ୟ ଖାଦ୍ୟ ହୋଇଥଲେ ବି ଓଡ଼ିଆଙ୍କ ଖାଦ୍ୟରେ ରହିଥାଏ ଭିନ୍ନ ଭିନ୍ନ ସ୍ୱାଦ। ଖଟା, ମିଠା, ରାଗ, ଲୁଣି ସବୁ ସ୍ୱାଦ ଓଡ଼ିଆଙ୍କ ପାଖେ ରହିଥାଏ । ଓଡ଼ିଆଙ୍କ ହାଣ୍ଡିଶାଳରେ ପାରମ୍ପରିକ ଖାଦ୍ୟର ପ୍ରସ୍ତୁତି ବେଶ ନିଆରା । ଯଦିଓ ଏବେ ବିଦେଶୀ ଖାଦ୍ୟର ଆସର ବଢିଛି କିନ୍ତୁ ଆମ ଦେଶୀ ଖାଦ୍ୟ ଏବେ ବି ତା ସ୍ଥାନ ବଜାୟ ରଖିଛି । ପିଠା ଆମର ଆଉ ଏକ ପରମ୍ପରା । ପ୍ରତ୍ୟେକ ଓଷା, ବ୍ରତରେ ଆମର ଭିନ୍ନ ଭିନ୍ନ ପିଠା ତିଆରି ହୁଏ । ଏଣ୍ଡୁରି, ଚକୁଳି, ମଣ୍ଡା, ଆରିସା ପରି ବହୁ ରକମର ପିଠା ତିଆରି ହୁଏ । ଓଡିଆ ଘରେ ପ୍ରାୟ ସବୁସମୟରେ ପିଠା ତିଆରି ହୋଇଥାଏ । ଓଡିଆ ଘରର ସମସ୍ତ ପିଠାର ସ୍ବାଦ ବେଶ୍ ନିଆରା । ଆସନ୍ତୁ ଜାଣିବା କିଛି ଓଡ଼ିଆ ପିଠା ସମ୍ପର୍କରେ ।