ଓଡ଼ିଶାର ଜଣେ ଖ୍ୟାତନାମା ଓଡ଼ିଆ କବି ଓ ଔପନ୍ୟାସିକ ହେଉଛନ୍ତି କାଳିନ୍ଦୀ ଚରଣ ପାଣିଗ୍ରାହୀ । ତାଙ୍କ ଲେଖାରେ ଓଡ଼ିଶାର ଗ୍ରାମ୍ୟ ପରିବେଶ, ଲୋକଙ୍କର ଆଚାରବିଚାର ପ୍ରମୁଖ ବିଷୟ ଭାବେ ସ୍ଥାନ ପାଉଥିଲା । ପଦ୍ମବିଭୂଷଣ, ସାହିତ୍ୟ ଏକାଡେମୀ ଆୱାର୍ଡ ଆଦି ଉପାଧିରେ ସମ୍ମାନିତ ହୋଇଥିବା ଏହି ଲେଖକଙ୍କର କାଳଜୟୀ ଉପନ୍ୟାସ ହେଉଛି ‘ମାଟିର ମଣିଷ’ । ୧୯୩୧ ମସିହାରେ ଏହି ଉପନ୍ୟାସଟିର ପ୍ରଥମେ ପ୍ରକାଶିତ ହେବା ପରେପରେ ଏହା ୧୯୭୬ ମସିହା ସୁଦ୍ଧା ବତିଶ ଥର ପୁନଃ ପ୍ରକାଶିତ ହୋଇଥିଲା । ୨୦୦୪ ମସିହାରେ ଏହି ଉପନ୍ୟାସଟି ସଚିତ୍ର ସଂସ୍କରଣରେ ପ୍ରକାଶିତ ହୋଇଥିଲା । ଓଡ଼ିଆ ସାହିତ୍ୟ ଜଗତରେ ଏହି କାଳଜୟୀ ଉପନ୍ୟାସକୁ ନେଇ ୧୯୬୬ ମସିହାରେ ମୃଣାଳ ସେନ "ମାଟିର ମଣିଷ" ଶୀର୍ଷକ ଓଡ଼ିଆ କଥାଚିତ୍ର ନିର୍ମାଣ କରିଥିଲେ । ଗୋପାଳ ଛୋଟରାୟ ଏହି କଥାଚିତ୍ରଟିର ଚିତ୍ରନାଟ୍ୟ ରଚନା କରିଥିଲେ । ସିନେମାର ପ୍ରଯୋଜନା ଭାର ବାବୁଲାଲ ଦୋଶୀଙ୍କ ହାତରେ ରହିଥିଲା । ଏହି ଚଳଚ୍ଚିତ୍ରଟି ପ୍ରଥମ ଓଡ଼ିଆ ଚଳଚ୍ଚିତ୍ର ଭାବରେ ଅନ୍ତର୍ଜାତୀୟ ଚଳଚ୍ଚିତ୍ର ଉତ୍ସବମାନଙ୍କରେ ପ୍ରଦର୍ଶିତ ହେବାର ସୁଯୋଗ ପାଇ ଓଡ଼ିଆ ଚଳଚ୍ଚିତ୍ର ଶିଳ୍ପ ପାଇଁ ଦିଗ ବାରେଣୀ ସାଜିଥିଲା । ସିନେମାଟି ମୁକ୍ତିଲାଭ କରି ଓଡ଼ିଆ ସିନେ ଜଗତରେ ଏକ ସଫଳ କଳାତ୍ମକ ସିନେମା ରୂପେ ଏକ ମାଇଲ୍ଖୁଣ୍ଟ ସୃଷ୍ଟି କରିବା ସହ ଜାତୀୟ ସିନେ ପୁରସ୍କାର ମଧ୍ୟ ହାତେଇ ଥିଲା । ୧୧୩ ମିନିଟ ଅବଧିର