ହିନ୍ଦୁ ସଂସ୍କୃତିରେ ବହୁ ପ୍ରକାରର ପୂଜା, ବ୍ରତ ପାଳନ କରାଯାଏ । ଭାରତରେ ବହୁବିଧ ପୂଜା କରାଯାଇଥାଏ । ପୁଣି ଦେଶର ସବୁ ରାଜ୍ୟରେ କିଛି କିଛି ଆଂଚଳିକ ପର୍ବମାନ ରହିଥାଏ । ସେଇ ରାଜ୍ୟର ଲୋକକଥା, ସଂସ୍କୃତିର ଗରିମାକୁ ବହନ କରିଥାଏ ସେଇ ପୂଜା ସବୁ । ଆଉ ଓଡ଼ିଶାରେ ବାର ମାସରେ ତେର ପର୍ବ ପାଳନ କରାଯାଏ । ଓଡ଼ିଶାରେ ଏପରିକି କିଛି ପୂଜା ବିଧି ରହିଛି, ଯାହା ଅନ୍ୟ କେଉଁ ଅଞ୍ଚଳରେ ଦେଖାଯାଏ ନାହିଁ, ଯେମିତିକି - ଚୈତ୍ର ମଙ୍ଗଳବାରରେ ପନ୍ଥେଇ ପୂଜା, ରଜ, ସାବିତ୍ରୀ, ମାଣବସା ଓଷା ଭଳି ଆହୁରି ଅନେକ । ସାରା ଭାରତରେ ମାତା ଲକ୍ଷ୍ମୀଙ୍କର ପୂଜା ତ କରାଯାଏ, କିନ୍ତୁ ଓଡ଼ିଶାରେ ମାର୍ଗଶୀର ମାସର ପ୍ରତ୍ୟେକ ଗୁରୁବାର ଦିନ ମାତା ଲକ୍ଷ୍ମୀଙ୍କର ଏକ ବିଶେଷ ପୂଜା କରାଯାଇଥାଏ, ଯାହାକୁ ମାଣବସା ଗୁରୁବାର ବୋଲି କୁହାଯାଏ । ଓଡିଶା ବ୍ୟତୀତ ଅନ୍ୟ କେଉଁଠି ଏହି ପର୍ବ ପାଳନ ହେବାର ନଜିର ନାହିଁ । ସାଧାରଣତଃ ଓଡିଶା ହେଉଛି କୃଷିଭିତ୍ତିକ ରାଜ୍ୟ । ଏଠାରେ ପାଳିତ ହେଉଥିବା ସମସ୍ତ ଓଷା, ପୂଜା କୃଷି ଆଧାରିତ । ମାଣବସା ଗୁରୁବାର ଓଷା ମଧ୍ୟ ଏକ କୃଷିଭିତ୍ତିକ ପର୍ବ । ଏହି ପର୍ବରେ ମହାଲକ୍ଷ୍ମୀଙ୍କୁ ଗୃହରେ ଧନଧାନ୍ୟ ବୃଦ୍ଧି ନିମନ୍ତେ ମଧ୍ୟ ପୂଜା କରାଯାଏ । ମାର୍ଗଶୀର ମାସରେ ଓଡ଼ିଆ ନାରୀମାନେ ଏହି ଓଷା ପାଳନ କରିଥାନ୍ତି ।