ସତୁରି ଦଶକରେ ନନ୍ଦକିଶୋର ବଳଙ୍କ ଲୋକପ୍ରିୟ ଉପନ୍ୟାସ ‘କନକଲତା’ ସିନେମାରୂପେ ମୁକ୍ତିଲାଭ କରିଥିଲା । ଗ୍ରାମୀଣ ସଂସ୍କୃତି, ତତ୍କାଳୀନ ଯୌତୁକ ପ୍ରଥା ଓ ସର୍ବୋପରି ପାରିବାରିକ ପୃଷ୍ଠଭୂମିରେ ରଚିତ ଏହି କାହାଣୀର ନିର୍ଦ୍ଦେଶନା ଓ ପ୍ରଯୋଜନା ଭାର ଘନଶ୍ୟାମ ମହାପାତ୍ରଙ୍କ ହାତରେ ରହିଥିଲା । ୧୬୧ ମିନିଟ ଅବଧିର ଏହି ସିନେମାଟି ୧୯୭୩ରେ କ୍ୟାପିଟାଲ ସିନେମା କଟକଠାରେ ମୁକ୍ତିଲାଭ କରିଥିଲା । ପଲ୍ଲୀ କବି ନନ୍ଦ କିଶୋର ବଳଙ୍କ ରଚନାବଳୀରେ ପଲ୍ଲୀ ପ୍ରକୃତିର ସୁନ୍ଦର ବର୍ଣ୍ଣନା ଫୁଟିଉଠିଥାଏ । ପିଲାମାନଙ୍କ ପାଇଁ ତାଙ୍କଦ୍ୱରା ରଚିତ "ନାନା ବାୟା ଗୀତ" ଓଡ଼ିଶାର ଘରେଘରେ ବେଶ୍ ପରିଚିତ । ସେ ୧୦୦ରୁ ଅଧିକ ସନେଟ ମଧ୍ୟ ଲେଖିଯାଇଛନ୍ତି । ତାଙ୍କ ସନେଟ ଗୁଡ଼ିକ ପ୍ରକୃତି ଓ ଜନଜୀବନର ଛବିରେ ପରିପୁଷ୍ଟ । ୧୯୨୫ରେ ସେ କନକଲତା (ଉପନ୍ୟାସ) ନାମରେ ଉପନ୍ୟାସଟିଏ ରଚନା କରିଥିଲେ । ଏହା ଧାରାବାହିକ ଭାବରେ ୧୯୧୩ରେ ଉତ୍କଳ ସାହିତ୍ୟ ପତ୍ରିକାରେ ପ୍ରକାଶିତ ହେଉଥିଲା । ଗାଉଁଲି ସରଳ ଜୀବନକୁ ଯୌତୁକ ଓ ବାଳବିବାହ କିପରି କଳୁଷିତ କରିଥାଏ ତାହାର ଛବି ଏଥିରୁ ଦେଖିବାକୁ ମିଳିଥିଲା । ମୁକ୍ତିଲାଭ କରିଥିବା ଏହି ସିନେମାରେ ହରିଶ ମହାପାତ୍ର, ନମ୍ରତା ଦାସ, ସୁଜାତା ଆନନ୍ଦ, ଜ୍ୟୋତ୍ସ୍ନା, ଗୋକୁଳ କର, ମିନା କୁମାରୀ, ପ୍ରେମଲତା, କାଶୀ ରଥ, ରେବତୀ ଓ ଶାନ୍ତିଲତା ପ୍ରମୁଖ ଅଭିନୟ କରିଥିଲେ । ସିନେମାର ଚିତ୍ରନାଟ୍ୟ ରଚନା କରିଥିଲେ ବସନ୍ତ ମହାପାତ୍ର ।