ବସନ୍ତର ମୃଦୁ ମଳୟ ଧୀରେ ଧୀରେ କମିଗଲାଣି, ନିଦାଘ ଗ୍ରୀଷ୍ମ ଧୀରେ ଧୀରେ ତାର ପ୍ରକୋପ ଦେଖାଇବା ଆରମ୍ଭ କଲାଣି । ଖରାର ଏହି ଝାଇଁ ଝାଇଁ ଖରାବେଳେ ମନ ଖୋଜୁଛି ପଖାଳ କଂସା । ଭୋଜନ ପ୍ରେମୀ ଓଡ଼ିଆମାନଙ୍କର ପାରମ୍ପରିକ ଖାଦ୍ୟ ହେଉଛି ପଖାଳ । ଗାଁ ହେଉ କି ସହର ସବୁଠି ପଖାଳର ଆଦର ରହିଛି । ଧନୀ ହେଉ କି ଗରିବ ସମସ୍ତଙ୍କ ପାଖରେ ରହିଛି ପଖାଳ ପ୍ରେମ । କିଏ ଜୀବନ ବଞ୍ଚାଇବା ପାଇଁ ପଖାଳ ଖାଏ ତ କିଏ ସଉକରେ ପଖାଳ ଖାଏ । ସେଥିପାଇଁ ତ କୁହାଯାଏ - ଓଡ଼ିଆ ମନ ଓଡ଼ିଆ ପ୍ରାଣ, ବୁଝେ ପଖାଳ କଂସା । କେବଳ ଖରାତାତିରୁ ରକ୍ଷା ପାଇଁ ପଖାଳ ଲୋଡ଼ା ହୁଏ ତାହା ନୁହେଁ, ଶୀତ ସକାଳର କଅଁଳିଆ ଖରାରେ ବସି ପଖାଳ ଖାଇବାର ମଜା ନିଆରା । ପଖାଳକୁ ନେଇ ଓଡ଼ିଆମାନେ ବେଶ୍ ଭାବପ୍ରବଣ । ଭାତକୁ ପାଣିରେ ପଖାଳି ତିଆରି କରାଯାଉଥିବାରୁ ଏହାକୁ ପଖାଳ କୁହାଯାଏ । ଏହାର ପାଣିକୁ ତୋରାଣି କୁହାଯାଏ । ପଖାଳ ଓଡ଼ିଆଙ୍କ ଏକ ସ୍ୱତନ୍ତ୍ର ପରିଚୟ । ଖାଲି ଓଡ଼ିଆ କାହିଁକି ଓଡ଼ିଆଙ୍କ ଆରାଧ୍ୟ ଦେବତା ପ୍ରଭୁ ଶ୍ରୀଜଗନ୍ନାଥ ବି ପଖାଳ ପ୍ରେମରେ । ଓଡ଼ିଆଙ୍କ ଏହି ପାରମ୍ପରିକ ଖାଦ୍ୟକୁ ଲୋକପ୍ରିୟ କରିବା ଉଦ୍ଦେଶ୍ୟରେ ମାର୍ଚ୍ଚ ୨୦ ତାରିଖକୁ ପଖାଳ ଦିବସ ରୂପେ ପାଳନ କରାଯାଉଛି ।