ଭାଷା ହେଉଛି ଏକ ଜାତିର ସାଂସ୍କୃତିକ ଉପଲବ୍ଧି । ସଭ୍ୟତାର ବିକାଶରେ ଭାଷାର ଅଭିବୃଦ୍ଧି ହୁଏ । ଯେଉଁ ଜାତି ସୁସଭ୍ୟ, ତା'ର ଭାଷା ସେହିପରି ମାର୍ଜିତ ଓ ପ୍ରଗତିଶୀଳ । ଭାଷା ବିନା ଜାତିର ସ୍ଥିତି ସମ୍ଭବ ନୁହେଁ । ୧୯୩୬ ମସିହାରେ ଭାଷାର ସ୍ବାତନ୍ତ୍ର୍ୟକୁ ଭିତ୍ତି କରି ଓଡିଶା ପ୍ରଦେଶର ସୃଷ୍ଟି ହେଲା । ଓଡ଼ିଶା ପ୍ରଦେଶର ସୃଷ୍ଟି ହେବା ପରେ ବି ଓଡ଼ିଆ ଭାଷା ଶାସ୍ତ୍ରୀୟ ମାନ୍ୟତା ପାଇଁ ବହୁ ସମୟ ସଂଘର୍ଷ କରିଥିଲା । ଶେଷରେ ୨୦୧୪ ମସିହା ଫେବୃଆରୀ ୨୦ରେ ଓଡ଼ିଆ ଭାଷାକୁ ଶାସ୍ତ୍ରୀୟ ମାନ୍ୟତାର ସ୍ୱୀକୃତି ମିଳିଲା । ମାତ୍ର ସେଇବର୍ଷ ମାର୍ଚ୍ଚ ୧୧ ତାରିଖରେ ଓଡ଼ିଆ ଭାଷା ଶାସ୍ତ୍ରୀୟ ଭାଷା ହେବା ନେଇ ବିଧିବଦ୍ଧ ଭାବେ ସରକାରୀ ବିଜ୍ଞପ୍ତି ଜାରି କରାଯାଇଥିଲା । ସେଇଦିନକୁ ଓଡ଼ିଆ ଶାସ୍ତ୍ରୀୟ ଭାଷା ଦିବସ ଭାବେ ପାଳନ କରିବା ପାଇଁ ରାଜ୍ୟ ସରକାର ନିଷ୍ପତ୍ତି ନେଇଥିଲେ । ଏହାପରଠାରୁ ମାର୍ଚ୍ଚ ୧୧ ତାରିଖକୁ ଶାସ୍ତ୍ରୀୟ ଓଡ଼ିଆ ଭାଷା ଦିବସ ରୂପେ ପାଳନ କରାଯାଉଛି । ଶାସ୍ତ୍ରୀୟ ଗୌରବ ଅର୍ଜନ କରିବାରେ ଓଡ଼ିଆ ହେଲା ଷଷ୍ଠ ଭାଷା, ପୁଣି ଭାରତୀୟ ଆର୍ଯ୍ୟ ଭାଷା ପରିବାରର ପ୍ରଥମ ଭାଷା । ଏହା ପୂର୍ବରୁ ତାମିଲ, ସଂସ୍କୃତ, ତେଲୁଗୁ, କନ୍ନଡ଼ ଓ ମାଲାୟାଲାଲମ୍‌କୁ ଶାସ୍ତ୍ରୀୟ ଭାଷା ମାନ୍ୟତା ମିଳିଛି । ଗୋଟିଏ ଭାଷାର ପ୍ରାଚୀନ ଐତିହ୍ୟ ଓ ମୌଳିକ