ବସନ୍ତ ଋତୁର ଶେଷ ମାସ ହେଉଛି ଚୈତ୍ର ମାସ । ଏହା ଓଡ଼ିଆ ହିନ୍ଦୁମାନଙ୍କର ଦ୍ଵାଦଶ ବା ଶେଷ ମାସ । ଚିତ୍ରା ନକ୍ଷତ୍ର ଯୁକ୍ତ ପୂର୍ଣ୍ଣିମା ପଡ଼ୁଥିବା ଚାନ୍ଦ୍ରମାସକୁ ଚୈତ୍ର ବା ଚଇତ ମାସ କୁହାଯାଏ । ଓଡ଼ିଆ ସଂସ୍କୃତିରେ ଏହି ମାସଟି ବେଶ୍ ଗୁରୁତ୍ୱପୂର୍ଣ୍ଣ । ଏହି ମାସରେ ବାସନ୍ତିକ ବା ଚୈତ୍ର ଦୁର୍ଗା ପୂଜା, ଚୈତ୍ର ପ୍ରତିପଦା ତଥା ସୃଷ୍ଟି ଆରମ୍ଭର ଆଦ୍ୟ ଦିବସ, ଅଶୋକାଷ୍ଟମୀ, ରାମ ନବମୀ, ମହାବିଷୁବ ସଂକ୍ରାନ୍ତି, ହିଙ୍ଗୁଳା ଯାତ୍ରା ଓ ଚୈତ୍ର ପୂର୍ଣ୍ଣିମା ଆଦି ପର୍ବ ପାଳନ କରାଯାଏ । ଚୈତ୍ର ପୂର୍ଣ୍ଣିମା ହେଉଛି ଚୈତ୍ର ମାସର ଶେଷ ଦିନ । ଦୋଳ ପୂର୍ଣ୍ଣିମା ପରଠାରୁ ଚୈତ୍ର ମାସ ଆରମ୍ଭ ହୋଇ ପୂରା ଏକ ମାସ ଯାଏ ରହିଥାଏ । ଓଡ଼ିଶାର ପୁରପଲ୍ଲୀରେ ଚୈତ୍ର ପୂର୍ଣ୍ଣିମା ବା ଚଇତି ପୁନେଇଁ ହେଉଛି ଏକ ମୁଖ୍ୟ ପର୍ବ । ଚୈତ୍ର ପୂର୍ଣ୍ଣିମାକୁ ଚଇତି ପରବ ଭାବେ ସାରା ଓଡ଼ିଶାରେ ଲୋକମାନେ ପାଳନ କରିଥା’ନ୍ତି । ମା ତାରିଣୀଙ୍କର ଏହା ହେଉଛି ମୁଖ୍ୟ ପର୍ବ । ଏହି ଦିନ ମା ତାରିଣୀଙ୍କର ସୁନାବେଶ ହାେଇଥାଏ । କେବଳ ମା ତାରିଣୀଙ୍କ ପୀଠରେ ନୁହେଁ ଓଡ଼ିଶାର ସବୁ ଦେବୀ ପୀଠରେ ଚଇତି ପର୍ବ ପାଳିତ ହୁଏ । କୈବର୍ତ୍ତ ସମ୍ପ୍ରଦାୟଙ୍କ ମୁଖ୍ୟ ପର୍ବ ହେଉଛି ଚୈତ୍ର ପୂର୍ଣ୍ଣିମା । ଘରେ ଘରେ ଖିରି, ପୁରୀ, ପିଠା