ଅଦାକୁ କିଏ ଅବା ନ ଜାଣେ । ଅଦା ନପଡ଼ିଲେ ତରକାରୀର ବାସନା ଓ ସୁଆଦ ଆସେନି । ତରକାରୀ ମସଲା ରୂପେ ଅଦା ଉଣାଅଧିକେ ସମସ୍ତଙ୍କ ଘରେ ବ୍ଯବହୃତ ହୁଏ । ଅଦା ଆମ ଭାରତୀୟ ମସଲାର ଏକ ପ୍ରମୁଖ ଉପାଦାନ । ଅଦାଗଛକୁ ଉଭିଦ ବିଜ୍ଞାନରେ କହନ୍ତି ଜିଞ୍ଜିବର ଅଫିସିନେଲ (Zingiber officinale) । ଅଦା ଏକ ଗୁଳ୍ମ ଜାତୀୟ ଉଦ୍ଭିଦ । ଏ ଗଛର ମୂଳକୁ ଅଦା ଭାବରେ ବ୍ୟବହାର କରାଯାଏ । ଆମ୍ବକଷିଆ ଅଦା ବୋଲି ଆଉ ଏକ ପ୍ରକାର ଅଦା ରହିଛି, କିନ୍ତୁ ତାହା ଗୁଣରେ ନିକୃଷ୍ଟ । ଓଡ଼ିଶାରେ ସର୍ବତ୍ର ଏହି ଗଛ ଦେଖାଯାଏ । ଆୟୁର୍ବେଦରେ ଅଦାକୁ ମହୌଷଧି ବୋଲି କୁହାଯାଇଛି । ଏହାକୁ କଞ୍ଚାବେଳେ ଅଦା ଓ ଶୁଖିଗଲେ ଶୁଣ୍ଠି କୁହାଯାଏ । ବହୁ ପୁରାତନ କାଳରୁ ଭାରତରେ ଅଦାର ବ୍ୟବହାର ହୋଇଆସୁଛି । ବହୁ ପୂର୍ବକାଳରୁ ଅଦା ଦକ୍ଷିଣ ଏସିଆର ଦେଶ ସମୂହରେ ଚାଷ ହୋଇ ଆସୁଅଛି । ତେଣୁ ଦକ୍ଷିଣ ଏସିଆକୁ ଏହାର ଜନ୍ମସ୍ଥଳୀ ବୋଲି କୁହାଯାଏ । ଲୋହିତ ସାଗର ବାଟେ ଅଦା ଇଉରୋପ ମହାଦେଶକୁ ଯାଉଥିବାରୁ ଗ୍ରୀକ୍‌ ଓ ରୋମାନ୍‌ମାନଙ୍କର ଧାରଣା ଯେ ଅଦା ଆରବ ଦେଶରୁ ଆସିଛି, କିନ୍ତୁ ତାହା ସତ୍ଯ ନୁହେଁ । ଅଦା ଚାଷର ପ୍ରଧାନସ୍ଥଳୀ ହେଉଛି ଭାରତବର୍ଷ, ପୂର୍ବଭାରତୀୟ ଦ୍ବୀପପୁଞ୍ଜ ଚୀନ୍‌, ପଶ୍ଚିମ ଭାରତୀୟ ଦ୍ଵୀପପୁଞ୍ଜ, ବିଶେଷତଃ ଜାମାଇକା, ଉତ୍ତର