ପବିତ୍ର ଘୋଷଯାତ୍ରାର ଅନ୍ତିମ ପର୍ବ ‘ନୀଳାଦ୍ରିବିଜେ’ । ନୀଳାଦ୍ରି ବିଜୟ କହିଲେ - ଚତୁର୍ଦ୍ଧା ମୁରତିଙ୍କ ରତ୍ନସିଂହାସନକୁ ବିଜେ କରିବା । ଦୀର୍ଘ ନଦିନ ଧରି ଜନ୍ମବେଦୀରେ ଲୀଳାଖେଳା ସାରି ପୁଣିଥରେ ଶ୍ରୀମନ୍ଦିରକୁ ବାହୁଡ଼ିଛନ୍ତି ଚତୁର୍ଦ୍ଧା ମୂରତି । ଆଜି ଥାଟ ବାଟ ଓ ଗହଳ, ଚହଳରେ ଶ୍ରୀଜୀଉମାନେ ରତ୍ନସିଂହାସନକୁ ବିଜେ କରିବେ । ପୂର୍ଵରୁ ଏହା ଆଷାଢ଼ ଶୁକ୍ଳ ଦ୍ୱାଦଶୀ ତିଥିରେ ଅନୁଷ୍ଠିତ ହେଉଥିଲା । ଏବେ ସାଧାରଣତଃ ତ୍ରୟୋଦଶୀ ତିଥିରେ ଅନୁଷ୍ଠିତ ହେଉଛି । ବାହୁଡ଼ା ଦଶମୀ ଦିନ ଠାକୁରମାନେ ଶ୍ରୀମନ୍ଦିରର ସିଂହଦ୍ୱାରକୁ ଫେରନ୍ତି, ମାତ୍ର ସିଂହଦ୍ୱାର ସାମ୍ନାରେ ରଥରେ ସେ ଆଉ ଦୁଇଦିନ ରୁହନ୍ତି । ଏକାଦଶୀ ଦିନ ସୁନାବେଶରେ ସଜ୍ଜିତ ହୋଇ ଭକ୍ତ ମନକୁ କୃତାର୍ଥ କରନ୍ତି ପୁଣି ଦ୍ୱାଦଶୀ ଦିନ ଆଧାର ଚୁମ୍ବିତ ଅଧରପଣା ଦ୍ୱାରା ସମସ୍ତ ଅଶରୀରୀମାନଙ୍କୁ ମୋକ୍ଷ ପ୍ରଦାନ କରନ୍ତି । ଏହାପରେ ତ୍ରୟୋଦଶୀ ଦିନ ମହାପ୍ରଭୁ ରତ୍ନସିଂହାସନକୁ ଫେରନ୍ତି । ଯାହାକୁ ‘ନୀଳାଦ୍ରି ବିଜୟ’ କୁହାଯାଏ । ସଂଧ୍ୟା ଧୂପ ସରିବା ପରେ ଏହି ନୀତି ଅନୁଷ୍ଠିତ ହୁଏ । ଗୋଟି ପହଣ୍ଡିରେ ଚତୁର୍ଦ୍ଧା ମୂରତି ରତ୍ନ ସିଂହାସନକୁ ବିଜେ ହୁଅନ୍ତି । ମାତ୍ର ଏହି ନୀଳାଦ୍ରି ବିଜୟରେ ଦେଖିବାକୁ ମିଳେ ଏକ ଅନନ୍ୟ ପରମ୍ପରା, ଯାହାକୁ ଲକ୍ଷ୍ମୀନାରାୟଣ କଳି କୁହାଯାଏ । ମହାପ୍ରଭୁ ଜଗନ୍ନାଥ ଭାଇ ଭଉଣୀଙ୍କୁ ସାଙ୍ଗରେ ଧରି ବୁଲିବାକୁ ଯାଆନ୍ତି, ମାତ୍ର ପ୍ରାଣପ୍ରିୟା ଲକ୍ଷ୍ମୀଙ୍କୁ