ଆଷାଢ଼ ମାସ ପୂର୍ଣ୍ଣିମା ଦିନକୁ ଗୁରୁ ପୂର୍ଣ୍ଣିମା ରୂପେ ପାଳନ କରାଯାଇଥାଏ । ଏହି ଦିନଟି ହେଉଛି ମହର୍ଷି ବ୍ୟାସଦେବଙ୍କର ଜନ୍ମତିଥି । ସେ ହେଉଛନ୍ତି ବେଦ, ବେଦାନ୍ତ, ଗୀତା ଓ ଉପନିଷଦର ଭାଷ୍ୟକାର ତଥା ମହାକାବ୍ୟ ଯୁଗର ମହାଭାରତ, ଅଷ୍ଟାଦଶ ପୁରାଣ, ଶ୍ରୀମଦ୍ ଭାଗବତ, ବ୍ରହ୍ମସୂତ୍ର ଆଦିର ପ୍ରଣେତା । ବେଦାନ୍ତ ଦର୍ଶନ ଓ ଅଦ୍ୱୈତବାଦର ସଂସ୍ଥାପକ ହେଉଛନ୍ତି ବ୍ୟାସଦେବ । ସେଥିପାଇଁ ଏହି ପୂର୍ଣ୍ଣିମାକୁ ବ୍ୟାସ ପୂର୍ଣ୍ଣିମା ବୋଲି ମଧ୍ୟ କୁହାଯାଏ । ଆମ ଜୀବନରେ ଗୁରୁଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । 'ଗୁ' କହିଲେ ଅନ୍ଧାର ଏବଂ 'ରୁ' ର ଅର୍ଥ ଅଜ୍ଞାନ ଅର୍ଥାତ୍ ଗୁରୁ ଅଜ୍ଞାନ ରୂପକ ଅନ୍ଧକାରରୁ ମୁକ୍ତ କରି ଆଲୋକ ପ୍ରଦର୍ଶନ କରନ୍ତି । ସେଥିପାଇଁ ଗୁରୁଙ୍କୁ ବ୍ରହ୍ମା, ବିଷ୍ଣୁ ଏବଂ ମହେଶ୍ୱର ବାେଲି କୁହାଯାଇଛି । ଭାରତୀୟ ଦର୍ଶନରେ ଗୁରୁଙ୍କ ସ୍ଥାନ ଭଗବାନଙ୍କଠାରୁ ଉର୍ଦ୍ଧ୍ବରେ । ଆମ ଜୀବନର ପ୍ରଥମ ହେଉଛନ୍ତି ମାତା - ପିତା । ଆମେ ଯାହାଙ୍କଠାରୁ ଶିକ୍ଷା ପାଉ ସେ ହେଉଛନ୍ତି ଆମ ଦ୍ବିତୀୟ ଗୁରୁ । ଜୀବନରେ ଶିକ୍ଷା ଗୁରୁ, ଦୀକ୍ଷା ଗୁରୁ ଭେଦରେ ଅନେକ ଗୁରୁ ଆସନ୍ତି । କହିବାକୁ ଗଲେ ଗୁରୁ ହେଉଛନ୍ତି ଏକ ସତ୍ତା । ଭାଗବତରେ ବର୍ଣ୍ଣିତ ଅବଧୂତ ବା ଦତ୍ତାତ୍ରେୟଙ୍କର ଚବିଶ ଗୁରୁ ରହିଥିଲେ । ହିନ୍ଦୁ ଧର୍ମ ହେଉ ଅଥବା ଅନ୍ୟ ସମସ୍ତ ଧାର୍ମିକ