ଖରାଦିନ ଆସିଗଲେ ଥଣ୍ଡା ପାନୀୟର ଚାହିଦା ବଢିଯାଏ । ତେବେ ବଜାରରେ ମିଳୁଥିବା ଥଣ୍ଡା ପାନୀୟଠାରୁ ଘର ତିଆରି ଥଣ୍ଡା ପାନୀୟ ସ୍ୱାସ୍ଥ୍ୟ ପାଇଁ ବେଶ ଭଲ । ଆମ ଓଡ଼ିଆ ଖାଦ୍ୟ ପରମ୍ପରାରେ ଥଣ୍ଡା ପାନୀୟ ଭାବେ ପଣା ମୁଖ୍ୟ ସ୍ଥାନ ଅଧିକାର କରିଛି । ଆମ ଓଡ଼ିଆ ସଂସ୍କୃତିରେ ପଣା ଏକ ମୁଖ୍ୟ ପ୍ରସଙ୍ଗ । ଚୈତ୍ର ମଙ୍ଗଳବାରର ପନ୍ଥେଇ ପୂଜାରେ ମୁଖ୍ୟ ଭୋଗ ଭାବେ ପଣା ଭୋଗ ହୋଇଥାଏ । ସେହିପରି ମହାବିଷୁବ ସଂକ୍ରାନ୍ତି ବା ଓଡ଼ିଆ ନବ ବର୍ଷରେ ଦେବଦେବୀଙ୍କ ନିକଟରେ ପଣା ଓ ଛତୁଆ ଭୋଗ ହେବାର ବିଧି ରହିଛି । ଆସନ୍ତୁ କିଛି ପାରମ୍ପରିକ ପଣାର ପ୍ରସ୍ତୁତି ବିଧି ଜାଣିବା । **ବେଲ ପଣା** : ଏହା ଓଡ଼ିଶାର ଏକ ପାରମ୍ପରିକ ପାନୀୟ । ବିଶେଷକରି ମହାବିଷୁବ ସଂକ୍ରାନ୍ତି ଦିନ ଏହି ପଣା ପ୍ରାୟ ସବୁ ଓଡ଼ିଆ ଘରେ ପ୍ରସ୍ତୁତ ହୁଏ । ଏହା ପିଇବା ପାଇଁ ଯେତିକି ସ୍ୱାଦିଷ୍ଟ, ଶରୀର ପାଇଁ ବି ସେତିକି ଭଲ । ଖୁବ କମ ସମୟରେ ଏହି ସ୍ୱାଦିଷ୍ଟ ପାନୀୟଟି ପ୍ରସ୍ତୁତ ହୋଇଥାଏ । ଆବଶ୍ୟକୀୟ ସାମଗ୍ରୀ: ପାଚିଲା ବେଲ, ଗୁଡ ବା ଚିନି (ଆପଣଙ୍କ ପସନ୍ଦ ଅନୁସାରେ), ଦହି, ଛେନା, ପାଚିଲା କଦଳୀ ଓ ଆପଣଙ୍କ ପସନ୍ଦ ମୁତାବକ କିଛି ଫଳ, ନଡ଼ିଆ କୋରା, କାଜୁ, କିସମିସ, ବାଦାମ, ଚେରି ଓ ଗୋଲମରିଚ ଗୁଣ୍ଡ ।