୧୯୮୪ ମସିହାରେ ମୁକ୍ତିଲାଭ କରିଥିବା ଓଡ଼ିଆ କଥାଚିତ୍ର ‘ମାୟା ମିରିଗ’ ଓଡ଼ିଆ ସିନେ ଇତିହାସରେ ସ୍ୱର୍ଣ୍ଣ ଅକ୍ଷରରେ ଲିପିବଦ୍ଧ । ଏହି କଥାଚିତ୍ରଟିର ନିର୍ମାଣ କରିଥିଲେ ନୀରଦ ମହାପାତ୍ର । ଏହି ସିନେମାରେ କିଶୋରୀ ଦେବୀ, ସମ୍ପଦ ମହାପାତ୍ର, ମନସ୍ୱିନୀ, ମଣିମାଳା, ବିନୋଦ ମିଶ୍ର, ବଂଶୀଧର ଶତପଥୀ, ସୁଜାତା ଆଦି କଳାକାରମାନେ ଅଭିନୟ କରିଥିଲେ । ବିଭୂତି ପଟ୍ଟନାୟକଙ୍କ କାହାଣୀର ଏହି ସିନେମାଟିରେ ସଂଳାପ ରଚନା କରିଥିଲେ ନୀରଦ ମହାପାତ୍ର । ଏଥିରେ ରାଜୁ ମିଶ୍ର କ୍ୟାମେରାରେ ସହାୟତା କରିଥିଲେ । ଏକ ମଧ୍ୟବିତ୍ତ ଯୌଥ ପରିବାରର କାହାଣୀକୁ ନେଇ ସଜ୍ଜିତ ଏହି କାହାଣୀରେ ପରିବାର ପ୍ରତି ଆଜିକାଲିର ପିଲାମାନଙ୍କର ମନସ୍ତତ୍ତ୍ୱକୁ ଦର୍ଶାଯାଇଛି । ସିନେମାର କାହାଣୀରେ ରାଜକିଶୋର ବାବୁ, ସ୍ତ୍ରୀ, ଚାରି ପୁଅ ଓ ଗୋଟିଏ ଝିଅ ଓ ବୁଢ଼ୀ ମା’ଙ୍କୁ ନେଇ ରୁହନ୍ତି । ଚାରି ପୁଅ ମଧ୍ୟରେ ବଡ ପୁଅ କଲେଜର ଅଧ୍ୟାପକ ଥିବାବେଳେ ସେ ବିବାହିତ । ଦ୍ଵିତୀୟ ପୁତ୍ରଟି ଦିଲ୍ଲୀରେ ଆଇଏଏସ ପାଇଁ ଟ୍ରେନିଂ ନେଉଥିବାବେଳେ ସମସ୍ତଙ୍କ ଆଶାର କାରଣ ପାଲଟିଛି । ତୃତୀୟ ପୁଅଟି ପରିବାର ମଧ୍ୟରେ ରହୁଥିବାବେଳେ ଚତୁର୍ଥ ପୁଅଟି କ୍ରିକେଟ ସୌଖିନ । ସମସ୍ତଙ୍କୁ ନେଇ ସାଙ୍ଗ ହୋଇ ଆଗକୁ ବଢିବାର ଆଶା ରଖିଥିବା ରାଜକିଶୋରବାବୁଙ୍କ ପରିବାରରେ ଭିନ୍ନ ସ୍ୱର ଶୁଭେ ଯେତେବେଳେ ତାଙ୍କର ଦ୍ଵିତୀୟ ପୁତ୍ର ଆଇଏଏସ ପାଇ ସାରିବା ପରେ ସହରରେ ବଢିଥିବା ଜଣେ ଝିଅଙ୍କୁ ବିବାହ କରେ