ଯାଯାବର ସିନେମାଟି ନାଟକ ‘ଯାଯାବର’ ଆଧାରରେ ନିର୍ମିତ ହୋଇଥିଲା । ଏହି ନାଟକର ସଫଳ ମଂଚାୟନ ପରେ ଏହା ସିନେମା ଆକାରରେ ମୁକ୍ତିଲାଭ କରିଥିଲା । ଏହି ସିନେମାରେ ସେତେବେଳର ବହୁ ଲୋକପ୍ରିୟ କଳାକାରମାନେ ଅଭିନୟ କରିଥିଲେ । ଏହି ସିନେମାର ମୁଖ୍ୟ ଭୂମିକାରେ ଶ୍ରୀରାମ ପଣ୍ଡା, ବନଜା ମହାନ୍ତି, ହେମନ୍ତ ଦାସ, ତ୍ରିପୁରା ମିଶ୍ର, ମାଷ୍ଟର ମାଣିଆ, ବାବି, ଦୁଃଖିରାମ, ହେମନ୍ତ, ଭବାନୀ ପଣ୍ଡା, ଶ୍ୟାମଳେନ୍ଦୁ, ମୀରା, ପ୍ରୀତି ପ୍ରମୁଖ ଅଭିନୟ କରିଥିଲେ । ସିନେମାଟି ୧୯୭୫ ମସିହା ଅକ୍ଟୋବର ମାସରେ ମୁକ୍ତିଲାଭ କରିଥିଲା । ସିନେମାର ନିର୍ଦ୍ଦେଶନା ଭାର ରହିଥିଲା ତ୍ରିମୂର୍ତ୍ତିଙ୍କ ହାତରେ । ଅଭିନେତା ହେମନ୍ତ ଦାସ, ନାଟ୍ୟକାର ବିଜୟ ମିଶ୍ର ଓ ସଂଗୀତକାର ଅକ୍ଷୟ ମହାନ୍ତି ପ୍ରମୁଖ ତ୍ରିମୂର୍ତ୍ତି ଭାବେ ଏଥିରେ ନିର୍ଦ୍ଦେଶନାର ଗୁରୁଦାୟିତ୍ୱ ନିଭାଇଥିଲେ । ଏହି ସିନେମାର ପ୍ରଯୋଜନା ଦାୟିତ୍ୱରେ ଥିଲେ ବିଜୟ ପଟ୍ଟନାୟକ । ସିନେମାଟି ପ୍ରଥମେ କଳାଧଳାରେ ମୁକ୍ତିଲାଭ କରିଥିବାବେଳେ ପୁନର୍ବାର ଏହା ରଙ୍ଗୀନରେ ମୁକ୍ତିଲାଭ କରିଥିଲା । ସିନେମାର କାହାଣୀ ଓ ସଂଳାପ ବିଜୟ ମିଶ୍ର ରଚନା କରିଥିବାବେଳେ ଏହାର ଚିତ୍ରନାଟ୍ୟର ଭାର ତ୍ରିମୂର୍ତ୍ତି ସମ୍ଭାଳିଥିଲେ । ସିନେମାରେ ଅକ୍ଷୟ ମହାନ୍ତି ଉଭୟ ଗୀତ ରଚନା ଓ ସଂଗୀତ ନିର୍ଦ୍ଦେଶନା ଦେଇଥିଲେ । ଏହି ସିନେମାର ଗୀତଗୁଡିକରେ ପ୍ରଣବ ପଟ୍ଟନାୟକ, ଅକ୍ଷୟ ମହାନ୍ତି, ତୃପ୍ତି ଦାସ, ଗୀତା ପଟ୍ଟନାୟକ ପ୍ରମୁଖ କଣ୍ଠଦାନ କରିଥିଲେ । ସିନେମାର ସମ୍ପାଦକ ଥିଲେ ମଦନ ଗୁପ୍ତେ