ଦୁଗ୍ଧ ବା କ୍ଷୀର ହେଉଛି ଏକ ପୁଷ୍ଟିକର ପାନୀୟ ପଦାର୍ଥ । ଏଥିରେ କ୍ୟାଲ୍ସିୟମ୍‍, ଫସ୍‍ଫରସ୍‍ ଓ ଅନ୍ୟ ପୋଷକ ତତ୍ତ୍ୱ ଗଚ୍ଛିତ ହୋଇ ରହିଥାଏ । କ୍ଷୀରକୁ ଏକ ସମ୍ପୂର୍ଣ୍ଣ ଆହାର ବୋଲି ମଧ୍ୟ କୁହାଯାଇଥାଏ । ଜୁନ ୧ତାରିଖକୁ ବିଶ୍ୱ ଦୁଗ୍ଧ ଦିବସ ରୂପେ ପାଳନ କରାଯାଉଥିବାବେଳେ ଭାରତରେ ନଭେମ୍ବର ୨୬କୁ ଜାତୀୟ ଦୁଗ୍ଧ ଦିବସ ରୂପେ ପାଳନ କରାଯାଏ । ଶ୍ୱେତ ବିପ୍ଳବର ଜନକ ଡ. ଭର୍ଗେସ୍ କୁରିଏନ୍‌ଙ୍କ ଜନ୍ମଦିନକୁ ଦେଶରେ ଜାତୀୟ ଦୁଗ୍ଧ ଦିବସ ରୂପେ ପାଳନ କରାଯାଏ । ୨୦୧୪ ରୁ ପ୍ରତିବର୍ଷ ୨୬ ନଭେମ୍ବର ଆମ ଦେଶରେ ଏହି ଦିବସ ପାଳନ କରାଯାଉଛି । ‘ଶ୍ୱେତ ବିପ୍ଲବ’ ବିଶ୍ୱର ସବୁଠାରୁ ବଡ଼ ଓ ସଫଳ କୃଷି ବିକାଶ କାର୍ଯ୍ୟକ୍ରମ । ଭାରତରେ ଏହା ଅପରେସନ ଫ୍ଲଡ଼ ଭାବେ ଅଭିହିତ କରାଯାଏ । ୧୯୨୧ ନଭେମ୍ବର ୨୬ତାରିଖରେ କେରଳର କୋଷିକୋଡ଼ରେ ଜନ୍ମ ହୋଇଥିଲେ ‘ଶ୍ୱେତ ବିପ୍ଲବ’ର ଜନକ ଡ. ଭର୍ଗେସ୍ କୁରିଏନ୍‌ । ଏକଦା ଭାରତ ଦୁଗ୍ଧ ଅଭାବୀ ରାଷ୍ଟ୍ର ଥିଲା । ମାତ୍ର ୧୯୯୮ରେ ଭାରତ, ଆମେରିକାକୁ ପଛରେ ପକାଇ, ବିଶ୍ୱର ଏକ ନମ୍ବର ଦୁଗ୍ଧ ଉତ୍ପାଦନକାରୀ ରାଷ୍ଟ୍ର ପାଲଟିଥିଲା । ଏହା ସମ୍ଭବ ହୋଇଥିଲା ଡ. ଭର୍ଗେସ୍ କୁରିଏନ୍‌ଙ୍କ ପାଇଁ । ଡ.କୁରିଏନ୍‌ଙ୍କର ଦୂରଦୃଷ୍ଟି, କାର୍ଯ୍ୟଶୈଳୀ, ନିଷ୍ଠାପର ଉଦ୍ୟମ ଦ୍ୱାରା ଦେଶ ଦୁଗ୍ଧ ବଳକା ରାଷ୍ଟ୍ରରେ ପରିଣତ ହୋଇଥିଲା । ସେ