ଯୋଗ ହେଉଛି ଭାରତୀୟ ସଂସ୍କୃତିର ଏକ ଅନନ୍ୟ ପରିଚୟ । ଯୋଗ ଶବ୍ଦ ସଂସ୍କୃତ "ଯୁଜ୍" ଧାତୁରୁ ଆସିଅଛି, ଯାହାର ଅର୍ଥ: "ଏକତ୍ର କରିବା, ଯୁକ୍ତ କରିବା, ସନ୍ଧି କରିବା ବା ଏକାତ୍ମତା । ଆଧ୍ୟାତ୍ମିକ ଅର୍ଥରେ ଏହା ଜୀବାତ୍ମା ଓ ପରମାତ୍ମାଙ୍କ ମିଳନକୁ ବୁଝାଏ । ଯୋଗର ଅର୍ଥ କେବଳ ଆମେ କରୁଥିବା ଆସନ ନୁହେଁ । ଯୋଗର ପ୍ରୟୋଗ ଓ ମାର୍ଗକୁ ନେଇ ଅନେକ ଶାଖା ରହିଛି । ଯୋଗ ଶରୀର, ମନ ଓ ଆତ୍ମାକୁ ଏକ ସୂତ୍ରରେ ଯୋଡ଼ିଥାଏ । ଯୋଗ ଦ୍ୱାରା ଉଭୟ ଶରୀର ଓ ମନ ସୁସ୍ଥ ରହିଥାଏ । ମାନବ ସଭ୍ୟତା ଆରମ୍ଭ ହେବା ଦିନଠାରୁ ଯୋଗ ରହିଛି ବୋଲି ବିଶ୍ୱାସ କରାଯାଏ । ଯୋଗ ମାନବ ସମାଜ ପାଇଁ ବରଦାନଠାରୁ ମଧ୍ୟ କିଛି କମ ନୁହେଁ । ଯୋଗର ଉପାଦେୟତାକୁ ଦୃଷ୍ଟିରେ ରଖି ଭାରତର କୋଣ ଅନୁକୋଣରେ ଯୋଗ ଦିବସ ପାଳନ ହେଉଛି ଓ ଏନେଇ ବିଭିନ୍ନ କାର୍ଯ୍ୟକ୍ରମ ଓ ଯୋଗ ଶିବିରମାନ କରାଯାଉଛି । ବିଦ୍ୟାଳୟ ଓ ମହାବିଦ୍ୟାଳୟରେ ମଧ୍ୟ ଯୋଗ ସମ୍ପର୍କିତ ଏକ ପାଠ୍ୟକ୍ରମ ରହିବା ସହ ଯୋଗ ଉପରେ ବିଭିନ୍ନ କାର୍ଯ୍ୟକ୍ରମ କରାଯାଉଛି । ଯୋଗର ବ୍ୟାପକ ପ୍ରଚାର ଓ ପ୍ରସାର ପାଇଁ ୨୦୧୫ ମସିହାରୁ ଜୁନ୍ ୨୧ ତାରିଖରେ ପ୍ରଥମେ ଅନ୍ତର୍ଜାତୀୟ ଯୋଗ ଦିବସ ପାଳନ କରାଯାଇଥିଲା । ଏହା ପରଠୁ ପ୍ରତ୍ୟେକ ବର୍ଷ ଯୋଗ ଦିବସ ପାଳନ