ଭାରତୀୟ ମସଲାରେ ପୋସ୍ତ ଏକ ଦରକାରୀ ମସଲା । ଗରମ ମସଲାଠାରୁ ଆରମ୍ଭ କରି ପୋସ୍ତ ନାନା ଭାବରେ ତରକାରୀପତ୍ରରେ ବ୍ଯବହୃତ ହୁଏ । ସାଧାରତଃ ବ୍ୟଞ୍ଜନକୁ ବହଳିଆ କରିବା ଓ ସୁଆଦ ଆଣିବା ପାଇଁ ପୋସ୍ତକୁ ବ୍ୟବହାର କରାଯାଏ । ପୋସ୍ତ ପଡ଼ିଥିବା ତରକାରୀର ଏକ ବିଶେଷ ସ୍ଵାଦ ରହିଥାଏ । ଆଳୁପୋସ୍ତ, ଜହ୍ନିପୋସ୍ତ, କଲରାପୋସ୍ତ ଆଦି ଲୋକପ୍ରିୟ ଓଡ଼ିଆ ବ୍ୟଞ୍ଜନ ଭାବରେ ପ୍ରଚଳିତ । ଏମିତିରେ ବି ପ୍ରାୟ ସବୁ ପରିବାରେ ପୋସ୍ତ ପକାଇ ଏକ ବ୍ୟଞ୍ଜନ ପ୍ରସ୍ତୁତ କରାଯାଏ । ଆଉ ପୁଣି ସନ୍ଦେଶ ଉପରେ ମଧ୍ୟ ପୋସ୍ତକୁ ଭାଜି କରି ଦିଆଯାଇଥାଏ । କେବଳ ଭାରତବର୍ଷ ନୁହେଁ, ଇଉରୋପରେ ମଧ୍ଯ ପୋସ୍ତ ଏକ ଲୋକପ୍ରିୟ ମସଲା ଓ ଖାଦ୍ୟ ରୂପେ କାହିଁ କେଉଁ କାଳରୁ ରହିଆସିଛି । ତେବେ ସର୍ବପ୍ରଥମେ ଏହା ସୁଇଜରଲାଣ୍ଡର ହ୍ରଦ ଉପକୂଳ ଅଞ୍ଚଳରେ ହେଉଥିବାର ପ୍ରମାଣ ରହିଛି । ସେଠାକାର ଆଦିମ ଅଧିବାସୀମାନେ ପୋସ୍ତକୁ ଭାଜି ମହୁ ସାଙ୍ଗରେ ଖାଉଥିଲେ ବୋଲି ସୂଚନା ରହିଛି । ସେହିପରି ଚେକୋସ୍ଲୋଭାକିଆରେ ମହୁ ଓ ପୋସ୍ତର ପୁର ଦେଇ ଏକ ପ୍ରକାର ସ୍ୱାଦିଷ୍ଟ ପେଷ୍ଟରୀ ତିଆରି କରାଯାଏ । ଭାରତବର୍ଷରେ ବି କେକ୍‌ ତିଆରିରେ ପୋସ୍ତ ବ୍ୟବହାର କରାଯାଏ । ପୋସ୍ତ କେବଳ ମସଲା ରୂପେ ନୁହେଁ ଏମିତିକି ଘରେ ରହୁଥିବା ପୋଷା ଚଢ଼େଇମାନଙ୍କର ଖାଦ୍ୟ ରୂପେ ମଧ୍ୟ ଏହା ବେଶ୍ ଜଣାଶୁଣା ।