କେଦାରନାଥ ସିଂଙ୍କ ଏକ ଚର୍ଚ୍ଚିତ କବିତା - "ବିଦ୍ରୋହ"

କେଦାରନାଥ ସିଂ (୭ ଜୁଲାଇ, ୧୯୩୪ - ୧୯ ମାର୍ଚ୍ଚ, ୨୦୧୮) ହିନ୍ଦୀ କବିତାର ପ୍ରଖରତମ ଆଧୁନିକ କାବ୍ୟସ୍ଵର । କବିତାରେ ସାଧାରଣ ଚିତ୍ର ଓ ଭାଷାର ପ୍ରୟୋଗ କରି ଅସାଧାରଣ କୁହୁକ ନିର୍ମାଣ କରୁଥିବା ଏହି ମହାନ କବିଙ୍କ ଏକ ଜନବାଦୀ କବିତାର ଓଡିଆ ଅନୁବାଦ ।


ଫଟୋ - ୱିକିପିଡିଆ

ଆଜି ଯେତେବେଳେ
ଘର ଭିତରକୁ ପଶିଲି
ଏକ ଅଦ୍ଭୁତ ଦୃଶ୍ୟରେ
ଆଶ୍ଚର୍ଯ୍ୟ ହେଲି

ମୋ ବିଛଣା କହିଲା... ଶୁଣ
ଏଇଠି ରହିଲା ମୋର ତ୍ୟାଗ ପତ୍ର
ମୁଁ ଏବେ ଫେରିବାକୁ ଚାହୁଁଛି
ମୋର କାର୍ପାସ ଭିତରକୁ

ଆଉ ସେଠାରେ ଥିଲା
ଚେୟାର ଏବଂ ଟେବୁଲମାନଙ୍କର
ଏକ ମିଳିତ ସାମ୍ମୁଖ୍ୟ
ସେମାନେ ଦୁଃଖରେ କହିଲେ ...
ହଜୁର - ବହୁତ ହେଲା ତୁମର ଅତ୍ୟାଚାର
ଆଉ ତୁମକୁ ସହିବା ଆମ ପକ୍ଷେ ସମ୍ଭବ ନୁହେଁ

ଆମର ଭାରି ମନେ ପଡୁଛି
ଆମର ଗଛ ଆମ ଜଂଗଲ
ଏବଂ ତାଙ୍କ ଭିତରେ ଥିବା
ଜୀବନ୍ତ ତରଳ ରସ
ଯେଉଁମାନଙ୍କୁ ହତ୍ୟାକରିଛ ତୁମେ

ଆଲମାରୀରେ ବନ୍ଦ
ବହିଗୁଡ଼ିକ ଚିତ୍କାର କରୁଥିଲେ
ଆମକୁ ଖୋଲ !
ଆମେ ଫେରିଯିବାକୁ ଚାହୁଁଚୁ
ଆମ ବାଉଁଶର ଜଙ୍ଗଲକୁ
ଏବଂ ଅନୁଭବ କରିବାକୁ ଚାହୁଁଛୁ
ଜଂଗଲୀ ବିଛା ଏବଂ ସାପମାନଙ୍କ ଦଂଶନ

ଅତ୍ୟଧିକ ବିରକ୍ତ ହୋଇ ପଡିଥିଲା
ସେହି ଶାଳୁଆ ଗଛର ଗଣ୍ଡି
ଯାହାକୁ କିଛିଦିନ ପୂର୍ବରୁ କୁଲୁରୁ କିଣା ଯାଇଥିଲା

ଶାଳ କହିଲା...ବାବୁ
ତୁମେ ମହାନ ବାବୁ !
ମୋର ଦୁମ୍ବା ମେଣ୍ଢା ମୋତେ
କେତେ ଆକୁଳ ହୋଇ ଡାକୁଛି
ଆଉ ତୁମେ ଏମିତି ଯେ
ମୋତେ ନିଜ ଦେହର
କାରାଗାରରେ ବନ୍ଦୀ ରଖିଛ

ଟେଲିଭିଜନ ଆଉ
ଟେଲିଫୋନର ଅବସ୍ଥା ଥିଲା ଶୋଚନୀୟ
ସେମାନେ ଉଚ୍ଚ ସ୍ୱରରେ କିଛି କହୁଥିଲେ
କିନ୍ତୁ ସେମାନଙ୍କର ଭାଷା
ମୋର ବୁଝିବା ବାହାରେ ଥିଲା

ସେତିକିବେଳେ
ନଳରୁ ଗଳୁଥିବା ପାଣି
ଯନ୍ତ୍ରଣାରେ ଛଟପଟ ହୋଇ କହିଲା...
ସବୁ ଜିନିଷର ଗୋଟେ ସୀମା ଥାଏ ବାବୁ !
ବହୁତ ହେଇଗଲା
ଯଦି ତୁମେ ପାରିବ ତେବେ ଶୁଣ ...
ଏହି ଜଳ ବୁନ୍ଦାର ସ୍ବରକୁ

ବର୍ତ୍ତମାନ ଆମେ ସମସ୍ତେ
ତୁମ ବନ୍ଦୀଶାଳାରେ ବନ୍ଦୀ !
ଆମେ ସମସ୍ତେ ମଣିଷର କାରାଗୃହରୁ
ମୁକ୍ତ ହେବାକୁ ଚାହୁଁ

ମୁଁ ଯେତେବେଳେ
ବାହାରକୁ ଗୋଡ଼ ବଢଉଥିଲି.-
ଶୁଣିଲି.. ହେ କୁଆଡେ ଯାଉଛ ତୁମେ

ମୋ କବାଟ ଧଡ କରି ବନ୍ଦ ହୋଇଗଲା...

Report an Error